الخميس، ٨ مايو ٢٠٠٨


السلام عليكم و رحمة الله و بركاته يا أهل الدار


غيبة طويلة اوى عن البلوج .. لأسباب كتير طبعا منها الشغل .. لكن أقولكم برده, حاسيت عالم البلوجات هنا جزء كبير منه ناقض,

مع انى للعلم ماتعمقتش لسة فيه للدرجة اللى أحكم عليه بيها.. و كلامى ده فى حد ذاته نقض.. هههههههه.. لكن بفكر .. هل بأه ده طبع فينا يا شعب مصر.. إننا نبص على الغلطات و احنا قاعدين على الدكة.. و شوف بيعملوا ايه وسمعت قالوا ايه و عرفت ظلمونا ازاى.. و العيش و العيشة و اللى عايشينها... !!!


فكرت كتير.. طيب إذا سلمونى المركز اللى بنقد تصرفات اللى ماسكه.. هل أنا أهلت نفسى بالدرجة اللى تخلينى اتصرف صح فى المكان ده!!!


طب هل و انا قاعدة بقلب فى البلاوى المسئولين شمال فى يمين هل فكرت فى حل ايجابى؟؟


هل عيوبى و نقاط تقصيرى فى شغلى انا اللى مسئوله عنه حتى لو كان صغير جدااا.. هل صلحته ؟؟!!


لا لا لا... انا لسة فى غيبوبة...مستنية اللى فوق يتصلح.. هل بحالى ده اذا وصلت فوق لنفس المكان مين فينا هايبقى أرحم من التانى؟؟


النية لوحدها ماتمشيش مصالح..


نبدأ من جوانا .. نبص على نفسنا من بره.. نلحقها قبل مانسمع من غيرنا اللى مايعجبناش...


بس كدة قلت اللى عايزاه..


إلى اللقاء

الاثنين، ١٩ نوفمبر ٢٠٠٧

ساعة .. من فضلك !!


ساعة .. من فضلك !!





...> مواطنة هانتقابل الساعة 7 بإذن الله على المحطة... ماشى ؟

بإذن الله .. بإذن الله

...> مواااطنـــــــة .. هاااا ؟؟؟

بإذن الله ماشى.. دى المسافة للمحطة بالميكروباص ربع ساعة... يبقى مفروض بإذن الله أنزل من البيت 7 إلا ربع... صح كدة؟؟ ! بصى كمان زيادة تأكيد, أول ما توصلى على المحطة رنيللى .. أو أقولك .. لما تيجى تنزلى من البيت رنيللى .. ماشى كدة ؟

...> ماشى, لما نشوف..

الصبح شأشأ..

أصحى بدرى عشان المعاد... حالة من 2:

1- قبل المعاد بساعة:
أكيد هالحق بإذن الله .. هو إيه يعنى اللى هاعمله: هاكوى البلوزة و الطرحة – و افطر عالسريع و اظبط الشنطة
بسرررعة.. الكوى أخد ربع ساااعة..... يادى النيلة ... بسررررعة
البيضة سخننننة .. لسانى اتلسع.. بففف بفففف ...مافيش وقت أبرد دلوقتى
اللبن أكيد سقع ... اختى غالياه من ساعة.. مفيش وقت أسخن !!.. و أهم بيقولوا اللبن فايدته يتشرب دافى (ياريته حتى محصل دى) الأمر لله
أغسل سنانى بسرعة.. الجيبة اتبلت من أرضية الحمام.. أأأأه
الطرحة.. إلى الطرحة.. الطـــــرحـــــــــــــــــة !!.. إهئ إهئ.. الطرحة اتزحلقت من على الكرسى و اتكرمشت تاااااانى.. المكوااااة

:: لما تلاقى الجد فى إيييده حفييييييده.. و الناحية التانية السبحة فى إيييده ::

الرنة .. الررررنة .. صاحبتى نزلت من البيت

الدبابيس.. اتعدلى بأه .. يوووووه ..يعنى الطرحة ما تتلخبطش الا و انا مستعجلة... أظبطها هناك!!
الشووز .. و ماله ما هو من شهر كدة ماجتش على يوم.. أبقى امسحه هناك..

الشنطة ...
ماما: خدى سندوتشات!
هاشتريها هناك
تن.. تن.. تن .. تن.. تن.. تن .. تن

سبعععععععة.. الساعة سبعة!!

::يبقى أنت أكيد أكيد فى مصـــــر.. يبقى انت أكيد أكييييييييييييييييييد فى مصر::

يا كسوووووووفى .. الرنة التانية.. سبق السيف العزل.. كدة وصلت للمحطة
قدرها ان انا صاحبتها.. قدامها ربع ساعة على الأقل على ما أوصلها

مع السلاااامة يا مااااما

طراااااااخ (الباب)


2- قبل المعاد بساعة و نص... بدرى و تمام التمام:
أكوى على مهلى...
أفطر.. يا سلااام .. هافطر على الترابيزة و قاعده كمان.. فيها إيه لما الواحد يصحى بدرى شوية و يستمتع بوقته كدة بدل اللهوجة..
ايه ده ! الشوز مش نضيف.. عيب عليا سايباه كام شهر مااتلمعش.. ابقشش عليه انهاردة...... وأأدى وش ورنيش..
نقول مع السلامة ,, لأ لأ استنى .. هو انا كل يوم هاكل من برة , تبقى خسارة صحة و مرتب.. سندوتشين مش هايخسروا.. و لسة فيه وقت...
و أدى سوستة الشنطة قفلناها و الشوز لبسناهو فتحنا الباب
تن.. تن.. تن.. تن.. تن..تن..تن

جررررررررررررررررررررررررررى


طراااااااخ (الباب)
تك تك تك تك.. (الجرى على السلالم)
هه هه هه هه.. (الجرى فى الشارع)


ميكروباص و لا تاكسى؟؟؟؟؟

ده بيعتمد على حالة الشارع و أهمية المشوار

و فى كلا الحالتين .. ببقى مقضية اليوم روحى فى مناخيرى .. من الإحساس بالذنب إنى لطعت واحدة مالهاش ذنب غير انها إلتزمت بالمعاد..

ضغط عصبى و عدم ارتياح يستمر لأخر اليوم

عندى خلل فى ربع ساعة .. غالبا متأخرة عن أغلب مواعيدى ربع ساعة

حللت سبب المشكلة دى عندى:: لقيت تفسيرين ..لأ تلاتة

1- يمكن لأننا متعودين من زمان إن ماما كانت بتقدم الساعة ربع ساعة عشان تروح شغلها بدرى
.. فبقيت دايما إظاهر عندى إحساس إن الساعة لسة مقدمة..

2- إن فى الكلية كنت أجى من النجمة .. ألاقى الدكاترة بتتأخر ( مش كلهم طبعا بس تلاكيك بأه)

3- إن المجهود الفظييييع اللى عانيت منه فى الكلية كان كتير بيخلينى أفضل انى انام خمس عشر دقايق زياده عن إنى أوصل بدرى الخمس عشر دقايق دول..


أريد حلاااااااااا

دلوقتى بشتغل الحمد لله
و العيب ده قااااتل
ماينفعش استمر بيه دلوقتى
عشان أحافظ على جودة العمل .. و عشان بقيت قدوة فى مكانى و ما أحبش حد يتعلم الصفة دى منى
أناشدنى و نناشد كل الغير منظمين أمثالى أن
إتقوا الله فينا
إحنا (أنا و أمثالى) جزء من بوظان البلد
ربنا يهدينا
و يعافيكم


هل من ساعة فعالة !!! لعلاج هذه الحالة .. زى ما فيه أحذية للى عندهم فلات فوت؟؟

الأحد، ١١ نوفمبر ٢٠٠٧

سامع ؟









حاصرتنى الفترة الماضية احساس مظلم بالهجوم على البلد و الإنتقاد فيها .. و الرغبة فى تركها و السفر للخارج .. حتى ألحق باقى عمرى اللى لسة ما ضاعش !!!

فى نفس الوقت .. لما آجى أفكر فى بلاد برة.. ألاقى إنى بصيت بس على مجال العلم.. لكن تجاهلت تماما الحياة البشرية اللى هناك بكل مساوئها..

يا ربى... لا بلدى طايقاها, و لا بلاد بره مستنضفاها (أخلاقيا)... أرووووووح فييييين ؟؟؟!!!!!

ساعتها أحس إن مفيش مكان غير القبر.. الموت... ما هو مفيش أرض عارفة أعيش عليها ......

:
:
:
:

...:: شفتوا ::.....

أخدتم بالكم التفكير فى الطريق ده بيؤدى لإيه

طريق مسدووود مسدووووود

:
:

و فعلا ... خلال الفترة دى ... بدأ مستوايا يقل.. ما أنا ماليش نفس لعمل شئ

ده غير الضياع اللى جيلنا اتربى عليه من عدم احترام للوقت و المواعيد و انعدام التنظيم

كل ده.. حسييت إنى بنزل .. بنزل.. ماليش حماسة لأى حاجة من اللى كنت بحلم بيها

:
:

و فجأة
:
:

و بفضل الله
:
انتبهت

:
:
ليه بأه حالى كدة ؟؟؟؟؟؟!!!!!

و ابتدى عقلى يسلسل الأحداث

:

يااااااااه... بلدى... أمى.. أرضى.. مكانى

كل ده بسبب إنى اتبريت منك

اتهمتك... هزأتك... رميت عليكى مسئولية أخطائى

:
:

يا بلدى انتى اتظلمتى

شايفاهم بيسقوكى السم بإيديهم..و انا عاجز إنى انقذك... فبلومك انتى.. ان انتى اللى ضعيفة... برغم ان الضعف ده بسبب السم اللى اتغرس فيكى بإيديهم...

شفت الطيارة فى السما بتبرق من شعاع الشمس

حنين خدنى انى اهرب فيها يمكن ألاقى حلم الغد

سمعت همسك و أنين قلبك ينادينى

تسيبنى لمين و ترمينى

أنا بحبك يا مصرى .. ما تتركنى لقتالينى.........



بحبك يا بلدى

بحبك

بحبك

و حتى إذا يوم سافرت .. اطمنى ... سفرى ساعتها هايكون قلبى متعلق فيه بيكى .. مش زى ما كنت أمس ... راميكى



هاسافر.. عشان أخد سلاح علم .. بيه أرجع أحميكى

الجمعة، ٢ نوفمبر ٢٠٠٧

باقى ملحمة " لما

باقى ملحمة " لما

- لما تروح لمكان يطلق عليه " أعرق مراكز البحوث فى مصر" .. و انت من اوائل كليتك.. و رئيس قسم يروح قايلك: يابنى من الأخر كدة, لو معاك واسطة من مجلس شعب أو حزب وطنى منه لرئيس المركز..!!!!


- لما انت برده تروح لنفس المركز ... بس المرة دى لسكرتيرة رئيس المركز بنفسه.. و انت برده من أوائل كليتك... فتعاملك و لا كأنك شحات ... و دموعك تسبق خطوات رجلك الخارجة من المكتب....!!!


- لما نفس الشخص .. انت برده .. بتعدى فى ممر نفس المركز .. فقلبك يتهز .. " الطريق إلى نوبل"... دى اليافطة اللى متعلقة فوق و كل الفائزين بجائزة نوبل على الجانبين.. حنين شدييييييد انك تشارك فى المشروع ده ... هيهات يا حزب شعبى !!!

-

- لما انت ..كمان... تسمع بعدين... إن أحد زملاء التخرج... بتقدير أقل بكتير.... دخل مشروع نوبل... طلع يعرف واحدة تعرف
أخت رئيس المركز... و رحب بالزميل جدااااااا .....!!!
لما تعرف ( انت لسة برده) .. من زميلك (إياااه برده) .. إن مشروع نوبل ...هههههه ... مايجيبش نوبل..!!


- لما تعرف (مش انت اللى فات)... إن المكان ده هو ..:: المركز القومى للبحوث::

الثلاثاء، ٣٠ أكتوبر ٢٠٠٧

لقطات





هل الكرسى ممكن يغير للدرجة دى..


هل الإنسان اللى عايش بيمثل ده مستريح...

هل ممكن الإحباط يوصلنا لحالة شلل...

هل ممكن يوصلنا لحالة انفصال عن بلدنا...!!!

هل الموضة اللى مغرقة المحلات .. سياسة...

لما يبقى دولابك فيه 3 أطقم أو 4 بس... مش عشان نقص فلوس.. لكن عشان مش لاقى فى المحلات حاجة تنفع تتلبس...

لما تيجى تاخد نفس... تلاقى الدنيا اسودت... ده ميكروباص طار من جنبك و حياك بنفس دخان محترم...

لما تيجى تاكل و انت بتقول " بسم الله الذى لا يضر مع اسمه شئ فى الأرض و لا فى السماء و هو السميع العليم"... أصلك مش ضامن انه مبيد حشرى اترش .. و لا انه فار اتفرم .. و لا أى نوع من السموم الفطرية دايب دووب .. و لا أنه ستايل من المسرطنات متحلى بيها الأكل..

لما تشرب ماء طعمه مش لذيذ.. أو تشترى مية معدنية و خايف من خامة نوع الزجاجة... أو تشرب عصير طبيعى 100 % و ما أسهل التأليف على العلب....

لما تشرب لبن (اللى مفروض انه خير الطعام).. و انت مش متخيل بقرته خدت كام مضاد حيوى .. و لا أكلت أد إيه أكل مسمم فطريا و لا اتحقنت بكام هرموون...

لما تاكل جبنة مثلثات ... و انت مش عارف ان معناها (جبنة فاسدة معدلة)....!!!

لما تاكل جبنة رومى.. و انت مش عارف ان نكهتها بتحلى كل ما السموم الفطرية تزييييييد..!!!

لما نبقى قاعدين ننتقد بالكلام ... و احنا نفسنا مش بنعمل شئ يذكر.... يبقى لازم كل واحد فى مكان بتحصل فيه البلاوى اللى اتقالت دى.. ياخد باله و يراعى ربنا...

لما أقولك ... ما تفتكرش ان الكلام خلص... لسة كلام كتير ... بإذن الله فى مشاركة تانية...

مش هى دى مصر اللى احنا عايزينها... مصر اتظلمت بسببنا... أهلها هما اللى خربوها ,, و فى الأخر بيلوموها...

الثلاثاء، ٢٣ أكتوبر ٢٠٠٧

...........



نقاط بلا حروف




لما فتحت المدونة دى .. كان هدفى إنى أسرد المواقف اللى بتحصل لفئة المواطنين أمثالى...


تفتكروا إبه اللى حصل!!!


كنت بحسب إنى مش هالاقى حاجة أكتبها بطريقة دورية


اللى فاجئنى


إنى بقيت كل يوم أرجع و معايا حكاية ممكن تتكتب


و بقت أزمة .. هل أكتب يوميا و لا أسيب وقت راحة بين كل بوست و اللى بعده



إنهاردة... انا عندى كذا حكاية ...


و مش طايقة أجيب سيرة أى حاجة


البلد دى عايزة إللى ينضفها ب "ديتول".. و لو فيه حاجة أقوى ..ياريت


آآآه يا دمــــــــــــــــــاااااغــــــــــــــــى

الأحد، ٢١ أكتوبر ٢٠٠٧

دنيا ورق



كام؟ .. 22 جنيه و 80 قرش


!!!!


المواطنة معيدة... بتعمل موضوع بحث لدكتور المادة اللى هاتمتحنها فى الإمتحان بتاع تمهيدى الماجيستير...


عملت نسخة حوالى 50 ورقة...


طبعتهم ... تكلفة رقم 1


صورت ليها نسخة.. و غلفت النسخة اللى هاتديها للدكتور ... تكلفة رقم 2


الدكتور طلب 4 نسخ كمان: عشان أ.د/ و , و أ.د/ ن , و أ.د/ م , و أ.م/ م


استعنا بالله


إلى مكتب التصوير


إذا سمحتى.. 5 نسخ


( الخامسة جت غلط... يلا زيادة تكلفة.. و رزق للمحل )


....أغلفهم!! ما اغلفهمش.. أغلفهم!! ما أغلفهمش..أ .....

أدبسهملك ؟؟؟


لا لأ.. بعد التصوير أقرر ...


بكام التغليف؟؟..... جنيه و 65


تشييييك... تشييييك .......>>> دى مكنة التصوير (لازم يكون لها كيان فى القصة


أه يا قلبى...


خمسة فى 50..... 250


يعنى 3 ج


نضرب فى 5.....


يبقوا 15 ج


إهئ إهئ


و 2 ج تغليف


يعنى تقفلها 20 ج


و مش هايقرووووووها


يبقى أنا هبلة و عبيطة إنى أصورهم


لو مصورتش.. يبقى عليه العوض فى المادة


هل هناك من طريقة أرخص ؟؟؟؟


أظن دى أرخص حاجة


أدبسهملك ؟؟؟؟


لأ لأ.. غلفى


:

:

:


اتفضلى


كام؟


.... للإجابة عن السؤال.... إقرأ أول سطر


يا ورقك يا بلد !!!


و ما زالت التكاليف مستمرة