الثلاثاء، ٣٠ أكتوبر ٢٠٠٧

لقطات





هل الكرسى ممكن يغير للدرجة دى..


هل الإنسان اللى عايش بيمثل ده مستريح...

هل ممكن الإحباط يوصلنا لحالة شلل...

هل ممكن يوصلنا لحالة انفصال عن بلدنا...!!!

هل الموضة اللى مغرقة المحلات .. سياسة...

لما يبقى دولابك فيه 3 أطقم أو 4 بس... مش عشان نقص فلوس.. لكن عشان مش لاقى فى المحلات حاجة تنفع تتلبس...

لما تيجى تاخد نفس... تلاقى الدنيا اسودت... ده ميكروباص طار من جنبك و حياك بنفس دخان محترم...

لما تيجى تاكل و انت بتقول " بسم الله الذى لا يضر مع اسمه شئ فى الأرض و لا فى السماء و هو السميع العليم"... أصلك مش ضامن انه مبيد حشرى اترش .. و لا انه فار اتفرم .. و لا أى نوع من السموم الفطرية دايب دووب .. و لا أنه ستايل من المسرطنات متحلى بيها الأكل..

لما تشرب ماء طعمه مش لذيذ.. أو تشترى مية معدنية و خايف من خامة نوع الزجاجة... أو تشرب عصير طبيعى 100 % و ما أسهل التأليف على العلب....

لما تشرب لبن (اللى مفروض انه خير الطعام).. و انت مش متخيل بقرته خدت كام مضاد حيوى .. و لا أكلت أد إيه أكل مسمم فطريا و لا اتحقنت بكام هرموون...

لما تاكل جبنة مثلثات ... و انت مش عارف ان معناها (جبنة فاسدة معدلة)....!!!

لما تاكل جبنة رومى.. و انت مش عارف ان نكهتها بتحلى كل ما السموم الفطرية تزييييييد..!!!

لما نبقى قاعدين ننتقد بالكلام ... و احنا نفسنا مش بنعمل شئ يذكر.... يبقى لازم كل واحد فى مكان بتحصل فيه البلاوى اللى اتقالت دى.. ياخد باله و يراعى ربنا...

لما أقولك ... ما تفتكرش ان الكلام خلص... لسة كلام كتير ... بإذن الله فى مشاركة تانية...

مش هى دى مصر اللى احنا عايزينها... مصر اتظلمت بسببنا... أهلها هما اللى خربوها ,, و فى الأخر بيلوموها...

الثلاثاء، ٢٣ أكتوبر ٢٠٠٧

...........



نقاط بلا حروف




لما فتحت المدونة دى .. كان هدفى إنى أسرد المواقف اللى بتحصل لفئة المواطنين أمثالى...


تفتكروا إبه اللى حصل!!!


كنت بحسب إنى مش هالاقى حاجة أكتبها بطريقة دورية


اللى فاجئنى


إنى بقيت كل يوم أرجع و معايا حكاية ممكن تتكتب


و بقت أزمة .. هل أكتب يوميا و لا أسيب وقت راحة بين كل بوست و اللى بعده



إنهاردة... انا عندى كذا حكاية ...


و مش طايقة أجيب سيرة أى حاجة


البلد دى عايزة إللى ينضفها ب "ديتول".. و لو فيه حاجة أقوى ..ياريت


آآآه يا دمــــــــــــــــــاااااغــــــــــــــــى

الأحد، ٢١ أكتوبر ٢٠٠٧

دنيا ورق



كام؟ .. 22 جنيه و 80 قرش


!!!!


المواطنة معيدة... بتعمل موضوع بحث لدكتور المادة اللى هاتمتحنها فى الإمتحان بتاع تمهيدى الماجيستير...


عملت نسخة حوالى 50 ورقة...


طبعتهم ... تكلفة رقم 1


صورت ليها نسخة.. و غلفت النسخة اللى هاتديها للدكتور ... تكلفة رقم 2


الدكتور طلب 4 نسخ كمان: عشان أ.د/ و , و أ.د/ ن , و أ.د/ م , و أ.م/ م


استعنا بالله


إلى مكتب التصوير


إذا سمحتى.. 5 نسخ


( الخامسة جت غلط... يلا زيادة تكلفة.. و رزق للمحل )


....أغلفهم!! ما اغلفهمش.. أغلفهم!! ما أغلفهمش..أ .....

أدبسهملك ؟؟؟


لا لأ.. بعد التصوير أقرر ...


بكام التغليف؟؟..... جنيه و 65


تشييييك... تشييييك .......>>> دى مكنة التصوير (لازم يكون لها كيان فى القصة


أه يا قلبى...


خمسة فى 50..... 250


يعنى 3 ج


نضرب فى 5.....


يبقوا 15 ج


إهئ إهئ


و 2 ج تغليف


يعنى تقفلها 20 ج


و مش هايقرووووووها


يبقى أنا هبلة و عبيطة إنى أصورهم


لو مصورتش.. يبقى عليه العوض فى المادة


هل هناك من طريقة أرخص ؟؟؟؟


أظن دى أرخص حاجة


أدبسهملك ؟؟؟؟


لأ لأ.. غلفى


:

:

:


اتفضلى


كام؟


.... للإجابة عن السؤال.... إقرأ أول سطر


يا ورقك يا بلد !!!


و ما زالت التكاليف مستمرة

الاثنين، ١٥ أكتوبر ٢٠٠٧

فلسطينى, انا إسمى فلسطينى


فلسطينى انا اسمى فلسطينى
نقشت اسمى على كل الميادين
بخط بارز يسمو على العناوين
حروف اسمى حروف اسمى تلاحقنى تعايشينى تغذينى
تبث النار فى روحى وتنبض فى شراينى
جبال النهر تعرفنى مغاورها وتدرينى
بذلت الطاقة الكبرى وقلت لامتى كونى
صلاح الدين فى اعماق اعماقى ينادينى
وكل عروبتى للثأر للتحرير تدعونى
وراياتي التى طويت على ربوات حطين
وصوت مؤذن الاقصى يهيب بنا اغيثونى
والاف من الاسري والاف المساجين
تنادى الامة الكبرى وتهتف بالملايين
تقول لهم الى القدس اليها قبل تأبينى
الى حرب تدك الظلم تزهق روح صهيون
وترفع فى سماء الكون اعلام فلسطين
وتأزر كلمتى تمضى
فلسطينى
فلسطينى
فلسطينى
منقووول

الصفحة الأولى

السلام عليكم
هابدأ معاكم بقصيدة شعر أثرت فيا أوى.. و فكرتنى!!
هاتقولولى : انتى ماعرفتيناش بنفسك و لا بهدفك من البلوجة..؟؟
أنا مواطنة مواليد سنة 1983 .. مصرية.. و مازلت.. صادفت مور كتير فى بلدى.. حاجات عجبتنى.. و حاجات صدمتنى..
كل موقف منها ولد جوايا مشاعر و كلام كتير ممكن أكون مالقيتش اللى يسمعه.. و يمكن أكون معرفتش أقوله و اوصفه.. و يمكن أكون قلته لما شبعت.. مش هاتفرق كتير
!!
إن شاء الله أنا هاقوله هنا
يمكن و اكيد فى ناس هاتشارك نفس الأفكار..
و حتى إذا محدش شارك.. أهو على الأقل.. خرجت من جوايا.. كلمات